لْإِنْجِيل غَارس ثْنَاين ن يِيسمَاون، قَّارن-اَس لْإِنْجِيل قَّارن-اَس ڒْعَهذ ذ جْذِيذ۔ لْإِنْجِيل ذَايس 27 ن سُّوْرَاث۔ سُّوْرَا وِيس سبْعَا أُو عِشْرِين قَّارن-اَس لْوَاحِي ن اَرَّسُوْل يُوْحَنَّا، يُوْرَا-ت سِيذْنَا يُوْحَنَّا أُو ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔ مِين يعْنَا سِيذْنَا يُوْحَنَّا؟ نتَّا زݣ ثنْعَاش نِّي ن اَرُّسُل يمزْوُوْرَا ن سِيذْنَا عِيسَى۔ سُّوْرَا-يَا يُوْرَا-ت سِيذْنَا يُوْحَنَّا ذِي ثيْزِيرْث ن بَطْمُس اَڒ مَانِي تُوْغَا يُوْزّڒ-يث لْمَلِيك ن رُوْمَا۔ سّنِّي يسّكّ سِيذْنَا يُوْحَنَّا سُّوْرَا-يَا غَار سبْعَا ن ثْجُمَاع ن ڒْمُوْمِنِين إِي ذَاس ؤُذْسنْت، تُوْغَا دْجَانْت ذِي لْإِقْلِيم اَرُّوْمَانِي ن أَسْيَا ذِي ڒْوقْث نِّي (خْزَر لْخَرِيطَا اَڒ وَادَّاي)۔ ذِي سُّوْرَا-يَا نڒْمذ اَطَّاس ن ثْمسْڒَايِين خ لْكِتَاب ن ثُوْذَارْث۔ يعْنِي سِيذْنَا عِيسَى لْمَسِيح يزمَّر اَذ يمْسح يسمَاون ن يِوْذَان زِي لْكِتَاب ن ثُوْذَارْث (لْوَاحِي 3: 5)۔ لْكِتَاب ن ثُوْذَارْث قَّارن-اَس عَاوذ لْكِتَاب ن يِيزْمَار (لْوَاحِي 13: 8 ذ 21: 27)۔ سِيذْنَا عِيسَى ذ نتَّا إِݣ يدْجَان ذ يزْمَار نِّي (لْوَاحِي 5: 1-14)۔ مَا ٱقَا-ث يزمّم يسم نّش نِغ ذ يِيسم نّم ذِي لْكِتَاب ن ثُوْذَارْث ن سِيذْنَا عِيسَى لْمَسِيح؟ غر لْأَيَاث-أَ إِي د يُوْرِين ذَا حمَا اَذ تسّْنذ مِين ذَاس غَا يوقْعن إِ ونِّي ؤُمِي يسم نّس ؤُفِين وَار يزمّم شَا ذِي لْكِتَاب ن ثُوْذَارْث۔ يعْنِي يقَّار لْوَاحِي ذݣ وُوْذم وِيس 20 زِي لْإَيَا 11 اَڒ 15:
ژْرِيغ يج ن لْعَرْش ذ اَشمْڒَاڒ ذ اَمقّْرَان۔ ونِّي خَاس يقِّيمن ثرْوڒ زَّايس ثْمُوْرْث ذ وجنَّا وَار ذَاسن يقِّيم ومْشَان۔ ژْرِيغ يمتِّينن، يمقّْرَانن ذ يمزْيَانن، بدّن زَّاث إِ لْعَرْش. نُوْرْزْمن لْكُتُب، ئِنُوْرْزم يج ن لْكِتَاب نّغْنِيت نتَّا ذ لْكِتَاب ن ثُوْذَارْث۔ تْوَاحَاسْبن يمتِّينن س مِين يُوْرِين ذِي لْكُتُب عْلَاحْسَاب ڒخْذَايم نْسن. ڒبْحَار يسلّم يمتِّينن إِݣ يشَّا۔ ڒْموْث ذ لْأَخِرَا سلّْمن يمتِّينن إِي ذَايْسن۔ تْوَاحَاسْبن، كُڒ يجّن عْلَاحْسَاب ڒخْذَايم نّس۔ ثْمنْضَار ڒْموْث ذ لْأَخِرَا ذݣ ويڒْمَام ن ثْمسِّي۔ أَيڒْمَام نِّي ن ثْمسِّي نتَّا إِݣ يدْجَان ذ ڒْموْث وِيس ثْنَاين۔ ون ؤُفِين وَار يزمّم ذِي لْكِتَاب ن ثُوْذَارْث يمنْضَار ذݣ ويڒْمَام ن ثْمسِّي۔
غر نِغ صنّط سْوَادَّاي إِ وَاوَاڒن نّغْنِيت ن أَربِّي إِي د يُوْسِين ذِي لْوَاحِي ن اَرَّاسُوْل يُوْحَنَّا۔
