لْإِنْجِيل غَارس ثْنَاين ن يِيسمَاون، قَّارن-اَس لْإِنْجِيل عَاوذ قَّارن-اَس ڒْعَهذ ذ جْذِيذ۔ لْإِنْجِيل ذَايس 27 ن سُّوْرَاث۔ سُّوْرَا وِيس ثْڒَاثَا يُوْرِي-ت سِيذْنَا لُوْقَا، أُو ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔ مِين يعْنَا سِيذْنَا لُوْقَا؟
نتَّا ذ يجّن زِي ڒْمُوْمِنِين يمزْوُوْرَا ن سِيذْنَا عِيسَى
۔ نتَّا ذ اَضْبِيب ذ اَمدُّوكڒ ن اَرَّسُوْل بُوْلُس، ئِتْسَافَر اَكِذس ذِي ڒْخذْمث نّس۔ ذِي سُّوْرَا-يَا ذَايس اَطَّاس خ مِين يوقْعن وَامِي د يخْڒق سِيذْنَا عِيسَى۔ ثقَّار سُّوْرَا ن سِيذْنَا لُوْقَا ذݣ وُوْذم وِيس 1 زِي لْأَيَا 26 اَڒ 35:
وَامِي إِلِيزَابت ثدْجَا ذِي شْهَار وِيس ستَّا، ئِسّكّ أَربِّي جِبْرِيل غَار يج ن ثنْدِينْت ذِي لْجَلِيل قَّارْن-اَس نَّاصِرَا۔ ئِرُوح غَار يج ن ثعْزْرشْت قَّارن-اَس مَرْيَم، كِذ يݣَّا زُّوجِيَا يج ن ورْيَاز زِي دُّورِّيث ن دَاوُد قَّارن-اَس يُوسف۔ يُوذف غَارس لْمَلَائِكَا ينَّا-اَس: "سْڒَام خَام، يَا ثنِّي إِي خف يرْضَا أَربِّي، سِيذِي أَربِّي اَكِذم۔" ذِنِّي ثْنخْڒع مَرْيَم وَامِي ثسْڒَا إِ وَاوَاڒ-أَ ن لْمَلَائِكَا۔ ثنَّا ذݣ يِيخْف نّس مَانْت ڒْمَعْنَا ن سْڒَام-أَ؟ ئِنَّا-اَس لْمَلَائِكَا: "وَار تݣّْوذ، أَ مَرْيَم، خَام اَرْضَا ن أَربِّي! أَذ تيْسِيذ اَعدِّيس، أَذ تجّذ يج ن وحنْجِير، أَث تْسمِّيذ عِيسَى۔ أَذ يِيڒِي ذ اَمقّْرَان، أَتَاف تْڒَغَان-اَس مِّيس ن ونِّي يُوْعْڒَان۔ أَذَاس يُوش سِيذِي أَربِّي نّس لْعَرْش ن جدِّيس دَاود۔ أَذ يحْكم خ شَّعْب ن يَعْقُوب إِ ڒبْدَا، ڒْمُلْك نّس عمَّارْص اَذ يفْنَا۔" ثنَّا-اَس مَرْيَم إِ لْمَلَائِكَا: "مَامّش مَانَايَا؟ قَا نش ذ ثَعْزْرشْت۔ "ئِجَاوب-يت لْمَلَائِكَا نِّي: "أَخَام د يهْوَا اَرُّوح يقدْسن، جّهْذ ن ونِّي يُوْعْڒَان اَخَام يݣّ ثِيڒِي۔ س مَانَايَا اَحنْجِير يقدْسن إِي غَا ثجّذ اَتَاف تْڒَغَان-اَس مِّيس ن أَربِّي۔
غر نِغ صنّط سْوَادَّاي إِ وَاوَاڒن نّغْنِيت ن أَربِّي إِي د يُوْسِين ذِي سُّوْرَا ن سِيذْنَا لُوْقَا۔
