لْإِنْجِيل غَارس ثْنَاين ن يِيسمَاون، قَّارن-اَس لْإِنْجِيل عَاوذ قَّارن-اَس ڒْعَهذ ذ جْذِيذ۔ لْإِنْجِيل ذَايس 27 ن سُّوْرَاث۔ سُّوْرَا وِيس اَرْبعَا يُوْرِي-ت سِيذْنَا يُوْحَنَّا، أُو ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔ مِين يعْنَا سِيذْنَا يُوْحَنَّا؟ نتَّا زِي ثنْعَاش نِّي ن اَرُّسُل يمزْوُوْرَا ن سِيذْنَا عِيسَى۔ وَامِي يبْذَا سِيذْنَا عِيسَى يتْبشَّر، سِيذْنَا يُوْحَنَّا نتَّا جَار اَرْبعَا ن يمحْضَارن نِّي إِݣ يخْضَار ذ اَمزْوَارُو سِيذْنَا عِيسَى اَذ خذْمن اَكِذس۔ ئِج ن يِيسم إِݣ يقَّار سِيذْنَا يُوْحَنَّا خ سِيذْنَا عِيسَى نتَّا ذ "أَوَاڒ ن أَربِّي۔" ثقَّار سُّوْرَا ن سِيذْنَا يُوْحَنَّا ذݣ وُوْذم وِيس 1 زِي لْأَيَا 14 اَڒ 18: أَوَاڒ-أَ يذْور ذ بْنَاذم، ئِزْذغ جَارَانغ. نشِّين نژْرَا لْعَظَمَا غَارس يدْجَان، لْعَظَمَا-يَا ثدْجَا غَار مِّيس وَاحْذس ن بَابَاس. نتَّا يشُّور س أَرْضَا ذ لْحَقِيقَا۔ ئِشْهذ خَاس يَحْيَى، ئِتْبرَّاح ينَّا: "ذ وَا إِي خف تُوْغَا سِّيوْڒغ. نِّيغ-أَوم أَذ د يَاس يجّن منْبَعْد إِ نش، وَلَكِن نتَّا يمْغَار خَافِي مِينْزِي تُوْغَاث قْبڒ مَا ٱذ يڒِيغ نش." س لْبَرَكَا نّس ثَمقّْرَانْت يرَرك-اَنغ مَارَّا س أَرْضَا خ أَرْضَا. شَّارِيعَا ن أَيث-إِسْرَائِيل ثمُّوْش خ وفُوْس ن مُوْسَى. أَرْضَا ذ لْحَقِيقَا نِثنْتِي ؤُسِينْت-يد خ وفُوس ن عِيسَى لمَسِيح. وڒَا ذ يجّن وَار يژْرِي أَربِّي عَمَّارْص. مِّيس وَاحْذس إِݣ يدْجَان ذݣ وُوْڒ ن بَابَاس ذ نتَّا إِي ذَانغ د يسضْهَارن سِيذِي أَربِّي. غر نِغ صنّط سْوَادَّاي إِ وَاوَاڒن نّغْنِيت ن أَربِّي إِي د يُوْسِين ذِي سُّوْرَا ن سِيذْنَا يُوْحَنَّا۔
