Řexḏayem n Arrusul s ṯmaziɣṯ n Arrif (Ṯarifiṯ)

Lʼinjil ɣares ṯnayen n yisemawen, qqaren-as Lʼinjil qqaren-as ƹaweḏ Ȓƹaheḏ ḏ jḏiḏ. Lʼinjil ḏayes 27 n ssuraṯ. Ssura wis xemsa yuri-t Siḏna Luqa u qqaren-as Ȓexḏayem n Arrusul. Ṯtarjem ḏanita s ṯmaziɣṯ n Arrif, iƹni ṯarifiṯ (ssura wis ṯȓaṯa yuri-t ƹaweḏ Siḏna Luqa). Min iƹna Siḏna Luqa? Netta ḏ ijjen zi ȓmuminin imezwura n Siḏna Ƹisa. Netta ḏ aḍbib ḏ ameddukeȓ n arrasul Bulus, itsafar akiḏes ḏi ȓxeḏmeṯ nnes. Aṭṭas zi min iweqƹen ḏi ssura-ya iwqeƹ-asen ƹaweḏ i Siḏna Luqa ḏ arrasul Bulus. Ḏi Ȓexḏayem n Arrusul itƹawaḏ min ḏasen iweqƹen i ȓmuminin imezwura ig yumnen zi Siḏna Ƹisa zi ssin aȓ ṯsawent menbaƹd i wami d ikkar zi ȓmewṯ itwarfeƹ ɣar ujenna. Ḏi lʼayaṯ iy d yusin ȓexxu a nẓer min iweqƹen jar Siḏna Ƹisa ḏ imeḥḍaren nnes wami itwarfeƹ ɣar ujenna zzaṯ nsen. Ṯessawaȓ xas ssura-ya ḏeg wuḏem wis 1 zi lʼaya 8 aȓ 11: Maca axmi xawem ɣa d ihwa Arruḥ iqeddsen, aɣarwem yiȓi jjehḏ. Axafi ṯcehḏem ḏi ṯendint n Lquds ḏ marra ṯamurṯ n Yahuḏiya ḏ Samarya aȓ ṭṭarf n ddunect." Wami ikemmeȓ Ƹisa awaȓ nnes, itwarfeƹ ɣar ujenna. Qqimen xezzaren ḏayes, iweddar-asen ḏeg useynu. Qqimen xezzaren mliḥ wami yuȓi ɣar ujenna, ƹlaɣafla ufin ṯnayen iṯarrasen bedden akiḏsen ɣarsen arruḍ ḏ acemȓaȓ. Nnan-asen: "Ay iwḏan n ṯmurṯ n Ljalil, mayemmi ḏa ṯbeddem ṯxezzarem ɣar ujenna? Ƹisa wanita iy ḏawem itwarfƹen ɣar ujenna, amecnaw mammec ṯeẓrim yuȓi ɣar ujenna, amenni iy d ɣa yas." Ɣer niɣ ṣenneṭ swadday i wawaȓen nneɣnit n Arebbi iy d yusin ḏi Ȓexḏayem n Arrusul.