Lkitab n Marqus ḏ ameddukeȓ n Siḏiṯneɣ Ƹisa Lmasiḥ s ṯmaziɣṯ n Arrif (Ṯarifiṯ)

Lʼinjil ɣares ṯnayen n yisemawen, qqaren-as Lʼinjil ƹaweḏ qqaren-as Ȓƹaheḏ ḏ jḏiḏ. Lʼinjil ḏayes 27 n ssuraṯ. Ssura wis ṯnayen yuri-t Siḏna Marqus, ṯtarjem ḏanita s ṯmaziɣṯ n Arrif, iƹni ṯarifiṯ. Min iƹna Siḏna Marqus? Netta zeg imeḥḍaren imezwura n Siḏna Ƹisa. Tuɣa yumen zi Siḏna Ƹisa, ibḏa iggur akiḏes ḏi ȓxeḏmeṯ nnes. Ṯeqqar Ssura n Siḏna Marqus ḏeg wuḏem wis 1 zi lʼaya 9 aȓ 11: Ḏi ȓiyyamaṯ nni yusa-d Ƹisa zi dcar n Nnaṣira, iy iǧan ḏi ṯmurṯ n Ljalil, iṭehhar-iṯ Yaḥya ḏeg yiɣzar n Lʼurdun. Wami d yuȓi zeg waman, ȓxeddnni iẓra ajenna inurzem, ḏ Arruḥ n Arebbi ihwa-d xas amecnaw ij n ṯeḏbirṯ. Ij n ṯmijja zeg ujenna ṯeqqar: "Cek ḏ memmi iƹizzen, farḥeɣ zzayek."

Iqqar ƹaweḏ ḏeg wuḏem wis 8 zi lʼaya 34 aȓ 38: Iȓaɣa-d x imeḥḍaren nnes ḏ ȓɣaci, inna-asen: "Wenni ixsen aḏayi iḏfar nec, aḏ ismeḥ ḏeg yixef nnes, aḏ ikessi ṣṣalib nnes mix ɣa iƹeddeb, aḏayi iḏfar. Ȓaḥeqqac wen ixsen aḏ irbeḥ ȓaƹmar nnes aṯ ixsar. Wen ɣa ixesaren ȓaƹmar nnes x ȓesbab inu ḏ ȓesbab n lʼinjil aṯ irbeḥ. Mizi ɣa ṯenfeƹ bnaḏem meȓa irbeḥ ddunect ṯekmeȓ aḏ ixsar ȓaƹmar nnes? Min ɣa yuc bnaḏem ḏeg umcan n ȓaƹmar nnes? Wenni xafi ɣa iƹeffaren, niɣ aḏ iƹeffar x wawaȓ inu ḏi zman-a aƹeffan ixeddƹen Arebbi, axas iƹeffar Mmis n bnaḏem xmi d ɣa yas s lƹaḍama n babas akeḏ lmalaʼikaṯ iqeddsen. Ɣer niɣ ṣenneṭ swadday i wawaȓen nneɣnit n Arebbi iy d yusin ḏi Ssura n Siḏna Marqus.