Ṯuḏarṯ n Siḏna Nuḥ s ṯmaziɣṯ n Arrif (Ṯarifiṯ)

Ṣenneṭ i ȓebƹaḏ n lʼayaṯ zi ssura umi qqaren Imezwura zeg wuḏem wis 6 aȓ 9. Ṯessawaȓ x Arebbi wami imḥa iwḏan x ṯmurṯ ḏi ȓiyyam n Siḏna Nuḥ, ṯtarjem ḏanita s ṯmaziɣṯ n Arrif, iƹni ṯarifiṯ.

Ɣer ḏanita x uɣarrabu igga Siḏna Nuḥ ƹlaḥsab awaȓ n Arebbi, ḏeg wuḏem wis 6 zi lʼaya 11 aȓ 22: Ikṯar ccerr ḏ lfasad ḏ imenɣan x ṯmurṯ qibač i Arebbi. Tuɣa xmi ixezzar Arebbi ɣar ṯmurṯ itwara-t ṯƹemmar s lfasad ȓaḥeqqac tuɣa iwḏan marra ffɣen abriḏ. Inna-as Arebbi i Nuḥ: "Yiweḍ ukemmaȓ n marra min iddaren ḏi ddunect ȓaḥeqqac iwḏan ccuren ṯamurṯ s imenɣan. Ƹlaḥasab manaya aṯen mḥiɣ niṯni ḏ ṯmurṯ. Egg i yixef nnec ij uɣarrabu s ukeccuḍ n ȓcejjur iy ṣebḥan, ṯeggeḏ aɣarrabu ḏ ṯizeddaɣ, dhen-iṯ s barra ḏ ḏaxeȓ s ṯizefṯ. Ha mamc ḏas ɣa ṯeggeḏ: Egg ḏayes miyya u xemsin mitru ḏi ṯuzeggwarṯ, xemsa u ƹicrin mitru ḏi ṯiriwt, xemmesṭac mitru ḏi ȓuƹȓa. Egg ṯizeqqa n uɣarrabu ṯejjeḏ taman n uzyen mitru jar ṯzeqqa ḏ ssarjem, egg x yij n jjihet ṯawwarṯ. Ṯeggeḏ ḏayes ṯȓaṯa n ṯzeddaɣ icten x ṯenneɣnit. Nec aqa ggureɣ aḏ ssekkeɣ ȓfayaḍan n waman ɣar ṯmurṯ bac aḏ qḍiɣ marra uw iǧa arruḥ, ḏ marra min iǧan x ṯmurṯ aḏ immeṯ. Maca cek, akic ggeɣ ȓƹaheḏ uca aḏ taḏfeḏ ɣar uɣarrabu cek, ḏ ṯarwa nnec, ḏ ṯemɣarṯ nnec, ḏ ṯemɣarin n ṯarwa nnec.

Itxeṣṣa-cek akiḏec ṯsiḏfeḏ ḏeg uɣarrabu ṯiyuya zi marra lḥayawan awṯem ḏ ṯewṯemt, ḥima aḏ qqimen uȓa n niṯni iddaren. Ṯawiḏ? akiḏec zi marra lmakla itwaccen, xemmeȓ-it ɣarek ḥima aḏ tiȓi ḏ lmakla i cek ḏ lḥayawan." Uca igga Nuḥ marra s min zi ṯ yumar Siḏi Arebbi.