Lwaḥi n Arrasul Yuḥanna s ṯmaziɣṯ n Arrif (Ṯarifiṯ)

Lʼinjil ɣares ṯnayen n yisemawen, qqaren-as Lʼinjil qqaren-as Ȓƹaheḏ ḏ jḏiḏ. Lʼinjil ḏayes 27 n ssuraṯ. Ssura wis sebƹa u ƹicrin qqaren-as Lwaḥi n Arrasul Yuḥanna, yura-t Siḏna Yuḥanna u ṯtarjem ḏanita s ṯmaziɣṯ n Arrif, iƹni ṯarifiṯ. Min iƹna Siḏna Yuḥanna? Netta zi ṯenƹac nni n arrusul imezwura n Siḏna Ƹisa. Ssura-ya yura-t Siḏna Yuḥanna ḏi ṯeyzarṯ n Baṭmus aȓ mani tuɣa yuzzeȓ-iṯ lmalik n Ruma. Ssenni issekk Siḏna Yuḥanna ssura-ya ɣar sebƹa n ṯmumaƹ n ȓmuminin iy ḏas uḏsent, tuɣa ǧant ḏi lʼiqlim arrumani n Asya ḏi ȓweqṯ nni (xzar lxariṭa aȓ wadday). Ḏi ssura-ya neȓmeḏ aṭṭas n ṯmesȓayin x Lkitab n Ṯuḏarṯ. Iƹni Siḏna Ƹisa Lmasiḥ izemmar aḏ imseḥ isemawen n yiwḏan zi Lkitab n Ṯuḏart (Lwaḥi 3:5). Lkitab n Ṯuḏarṯ qqaren-as ƹaweḏ Lkitab n Yizmar (Lwaḥi 13:8 ḏ 21:27). Siḏna Ƹisa ḏ netta ig iǧan ḏ izmar nni (Lwaḥi 5:1-14). Ma aqa-ṯ izemmem isem nnec niɣ ḏ yisem nnem ḏi Lkitab n Ṯuḏarṯ n Siḏna Ƹisa Lmasiḥ? Ɣer lʼayaṭ iy d yurin ḏa ḥima aḏ tessneḏ min ḏasen ɣa iweqƹen i wenni umi isem nnes ufin war izemmem ca ḏi Lkitab n Ṯuḏarṯ. Iƹni iqqar Lwaḥi ḏeg wuḏem wis 20 zi lʼaya 11 aȓ 15: Ẓriɣ ij n lƹarc ḏ acemȓaȓ ḏ ameqqran. Wenni xas iqqimen ṯerweȓ zzayes ṯmurṯ ḏ ujenna war ḏasen iqqim umcan. Ẓriɣ imettinen, imeqqranen ḏ imezyanen, bedden zzaṯ i lƹarc. Nurzmen lkutub, inurzem ij n lkitab nneɣnit netta ḏ Lkitab n Ṯuḏarṯ. Twaḥasben imettinen s min yurin ḏi lkutub ƹlaḥsab ȓexḏayem nsen. Ȓebḥar isellem imettinen ig icca. Ȓmewṯ ḏ Lʼaxira sellmen imettinen iy ḏaysen. Twaḥasben, kuȓ ijjen ƹlaḥsab ȓexḏayem nnes. Ṯmenḍar ȓmewṯ ḏ Lʼaxira ḏeg uyeȓmam n ṯmessi. Ayeȓmam nni n ṯmessi netta ig iǧan ḏ ȓmewṯ wis ṯnayen. Wen ufin war izemmem ḏi Lkitab n Ṯuḏarṯ imenḍar ḏeg uyeȓmam n ṯmessi. Ɣer niɣ ṣenneṭ swadday i wawaȓen nneɣnit n Arebbi iy d yusin ḏi Lwaḥi n Arrasul Yuḥanna.