Ṣenneṭ i ȓebƹaḍ n lʼayaṯ zi ssura umi qqaren Lkitab amezwaru n Ṣamwil. Ṯessawaȓ x ȓiyyam n Ḥanna u ḏ mmis Siḏna Ṣamwil, ṯtarjem ḏanita s ṯmaziɣṯ n Arrif, iƹni ṯarifiṯ.
Ɣer ḏanita x Siḏna Ṣamwil wami tuɣa-ṯ ḏ aḥenjir iȓaɣa-yas-d Siḏ Arebbi ḥima aḏ yiȓi ḏ nnabi. Manaya aqa-ṯ ḏi Lkitab amezwaru n Ṣamwil ḏeg wuḏem wis 3: Ixeddem Ṣamwil i Arebbi swadday n ȓʼamer n Ƹali. Tuɣa qlil xmi issawaȓ Arebbi akeḏ bnaḏem niɣ aḏas d iseḍhar can ruʼya ḏeg wussan nni.
Ƹali ȓefqih ibḏa itḏewwaȓ ḏ aḍarɣaȓ, tuɣa-ṯ iṭṭeṣ ḏeg umcan nnes n ȓebda. Ṣamwil tuɣa-ṯ iṭṭeṣ ḏeg umcan itwaqeddsen mani iǧa ṣṣenduq iy ḏi ǧant ƹecra n ȓuṣiyaṯ iy d yuwi Siḏna Musa. Ɣar ȓefjaȓ, aȓami ȓqendiȓ n umcan itwaqeddsen tuɣa-ṯ ƹaḏ iceƹƹeȓ, iȓaɣa-d Arebbi x Ṣamwil uca yarra xas: "Wah, a siḏi." Iqȓeƹ ɣar Ƹali inna-as: "Ṯȓaɣiḏ-ayi-d, aqayi."
Inna-as Ƹali: "Nec war ḏac d ȓaɣiɣ ca, ḏweȓ aḏ teṭṭṣeḏ." Iruḥ Ṣamwil aḏ iṭṭeṣ.
Iȓaɣa-d Arebbi amur wis ṯnayen x Ṣamwil, ikkar iruḥ ɣar Ƹali: "Aqayi usiɣ-d ȓaḥeqqac ṯȓaɣiḏ-ayi-d."
Ijaweb-iṯ: "Nec war ḏac d ȓaɣiɣ ca, a wulidi. Ḏweȓ aḏ teṭṭṣeḏ."
Tuɣa-ṯ Ṣamwil ƹaḏ war issin Arebbi, tuɣa-ṯ ƹemmarṣ war ɣares d issiweȓ. Uca iȓaɣa-yas Arebbi wis ṯeȓt-marraṯ, ikkar iruḥ ɣar Ƹali inna-as: "Aqayi usiɣ-d ȓaḥeqqac ṯȓaɣiḏ-ayi-d."
Ȓxeddnnit issen Ƹali belli ḏ Arebbi iy tuɣa d itȓaɣan i uḥenjir nni. Inna-as: "Ruḥ, aḏ teṭṭṣeḏ. Meȓa iȓaɣa-yac-d Arebbi, aḏ tiniḏ: Siweȓ ay Arebbi, ȓƹabḏ nnec itesȓa." Iruḥ iṭṭeṣ ḏeg umcan nnes.
Iȓaɣa-d Arebbi amammec tuɣa igga s qbeȓ: "A Ṣamwil, a Ṣamwil."
Yarra xas: "Siweȓ, ȓaḥeqqac ȓƹabḏ nnec itesȓa."
Inna-as Arebbi: "Aqaṯ aḏ d yas ij n nhar aḏ ggeɣ i yiwḏan n Bani Israʼil can ṯmesȓayin ḏ ṯiƹeffanin, marra yinni ɣa xas isȓan aḏ tƹejjben. Ḏi nhar nni aḏ ggeɣ marra min tuɣa ḏas nniɣ i Ƹali. U tuɣa nniɣ-as belli aḏ ƹeqqbeɣ familya nnes i ȓebda ȓaḥeqqac ṯarwa nnes nnan ṯimesȓayin ḏ ṯiƹeffanin xafi, war ḏayi weqqaren ca. Ƹali tuɣa issen belli teggen dnub maca war ṯen isbedd ca. X manawiya jjaǧeɣ i ṯeddarṯ nnes belli dnub nsen war ɣarsen bu ƹedduȓ waxxa qeddmen taḍḥiyaṯ u qarrben-d zzaysent ɣari."
Ṣamwil iqqim ḏi ṯassuṯ ḥetta aȓ ṣbaḥ uca ikkar irzem ṯiwwura n umcan itwaqeddsen. Iggweḏ aḏas yini i Ƹali min iẓra ḏi ruʼya. Ƹali iȓaɣa-yas-d: "
A
Ṣamwil, a wulidi."
Yarra xas: "Wah, a siḏi."
"Min ḏac inna Arebbi? War xafi snuffar walu. Ac iƹeqqeb Arebbi meȓa war ḏayi ṯenniḏ marra min ḏac inna." Uca iƹaweḏ-as marra, war ijji uȓa ḏ ij n ȓḥajeṯ war ḏas t yini.
Ƹali inna: "Netta ḏ Arebbi, aḏ igg min itwaȓa nican."
Ȓami iȓa itemɣar Ṣamwil Arebbi tuɣa-ṯ akiḏes. Marra min inna yarri-ṯ iffeɣ nican. Marra iwḏan n Bani Israʼil zi ṯendint n Dan ḏi ccamal ɣar Wanu n Sebƹa ḏi ljanub ssnen belli Ṣamwil netta ḏ nnabi n Arebbi s ṯiḏet. Arebbi iqqim itmeḍhar-as-d i Ṣamwil aṭṭas n imuren ḏi Ciluḥ, issiweȓ-d ɣares. U meȓmi tuɣa Ṣamwil issawaȓ, marra iwḏan sḥessan ɣares.
