Ṣenneṭ i ȓebƹaḏ n lʼayaṯ zi ssura umi qqaren Imezwura zeg wuḏem wis 37 aȓ 50. Ṯessawaȓ x ȓiyyam n Siḏna Yusef, ṯtarjem ḏanita s ṯmaziɣṯ n Arrif, iƹni ṯarifiṯ.
Ɣer ḏanita x ṯirja n Siḏna Yusef iy yurja x ayṯmas ḏ babas ḏ yemmas. Manaya aqaṯ ḏeg wuḏem wis 37 zi lʼaya 1 aȓ 11: Tuɣa Siḏna Yaƹqub izḏeɣ ḏi ṯmurṯ n Kanƹan mani immuṯ babas Isḥaq ḏ jeddes Siḏna Brahim. U Siḏna Yaƹqub tuɣa ɣares arbeƹa n ṯemɣarin ḏ ṯenƹac n iḥenjiren.
Yusef, ḏ ijjen zeg iḥenjiren nnes, wami tuɣa ɣares sbaƹṭac n iseggwusa tuɣa itraḥ itrass ȓebhayem akeḏ ayṯmas imeqqranen zi babas. U netta tuɣa itƹawaḏ xasen ȓexbar war iḥȓin i babas.
Tuɣa Siḏna Yaƹqub iƹizz xas Yusef aṭṭas x marra iḥenjiren nnes minzi netta ḏ mmis amezwaru n ṯemɣarṯ xas iƹizzen, u manaya iy ṯ ijjin yuca-as ṯaqmijat ḏ jḏiḏ. Nhar wami ẓrin Yusef iƹizz aṭṭas x babas, carhen-ṯ uca tuɣa war zemmaren akiḏes ssiwȓen s wawaȓ iṣebḥan.
Ij umur Yusef yurja ij n ṯerjiṯ, u iƹaweḏ-it i ayṯmas, uca rennin carhen-ṯ ktar. Netta inna-asen: "Sḥessem ɣari. Qa ṯarjiṯ-a iy urjiɣ: Ẓriɣ axmi neccin netcedda ṯiqeṯnin n imendi ḏeg yiyer. Cway cway, axmi ṯaqettunt inu n imendi ṯbedd nican u ṯiqeṯnin nwem nnḍent-as, sejjḏent-as."
Nnan-as ayṯmas: "Ma ṯfekkareḏ cek axaneɣ ṯḥekmeḏ?" Uca rennin ƹaḏ carhen-ṯ ƹlaḥsab n ṯerjiṯ nnes ḏ wawaȓen nnes.
Yurja ƹaweḏ ij n ṯerjiṯ nneḍnit, iƹaweḏ-it i ayṯmas, inna-asen: "Nec urjiɣ ij n ṯerjiṯ axmi ṯfuct ḏ ṯziri ḏ ḥiṭac n yiṯran marra iḏsen sejjḏen-ayi." Umbaƹd iƹaweḏ-it i babas ḏ ayṯmas marra. Inna-as babas: "Mana ṯarjiṯ-a iy ṯurjiḏ? Ma tfekkareḏ s ṯiḏet nec ḏ yemmac ḏ ayṯmac aɣarek d nas bac aḏac nsejjeḏ?" Uca ḥesḏen-ṯ ayṯmas aṭṭas x manaya, maca babas iqqim itfekkar ḏi manawiya.
