Ṣenneṭ i ȓebƹaḏ n lʼayaṯ zi ssura umi qqaren Imezwura zeg wuḏem wis 1 aȓ 5. Ṯessawaȓ x Arebbi wami d ixȓeq ddunect u ḏ ȓiyyam n Siḏna Adam, ṯtarjem ḏanita s ṯmaziɣṯ n Arrif, iƹni ṯarifiṯ.
Ɣer ḏanita min iweqƹen jar Qabil ḏ Habil ṯarwa n Siḏna Adam ḏ Ḥawwa, ḏeg wuḏem wis 4 zi lʼaya 1 aȓ 12: Ṯeysi Ḥawwa aƹeddis, ṯejja-d aḥenjir qqaren-as Qabil. Uca ṯenna-as: "S ȓemƹawneṯ n Arebbi jjiɣ-d aryaz." Awarnas ṯejja-d umas Habil. Tuɣa Habil netta ḏ aniči n ȓebhayem, Qabil tuɣa-ṯ ḏ afeǧaḥ.
Awarni can wussan ikkar Qabil ikkes zi min ḏas ṯurew ṯmurṯ, iqarreb zzayes ɣar Arebbi. Habil netta ƹaweḏ ikkar iṭṭef zi ȓebhayem nnes uca iɣareṣ zi min ɣares iǧan ḏ aṣebḥan iqarreb zzayes ɣar Arebbi. Iqbeȓ Arebbi ȓehdiyeṯ n Habil u yarḍa xas. Maca Qabil ḏ ȓehdiyeṯ nnes war ṯen iqbiȓ ca. Uca ixeyyeq Qabil aṭṭas ḥetta aȓ mani iɣeyyar ḏeg uɣembub nnes. Isseqsa-ṯ Arebbi: "Mayemmi ṯxeyyqeḏ? Mayemmi iɣeyyar uɣembub nnec? Ma iǧa ṯeggiḏ min iṣebḥan aḏ trebḥeḏ, ma iǧa war ṯeggiḏ min iṣebḥan aḏ tafeḏ traja-cek ȓmuƹṣiyeṯ. Ȓmuƹṣiyeṯ nni ṯxes axak ṯeḥkem maca itxeṣṣa-cek axas ṯḥekmeḏ."
Issiweȓ Qabil akeḏ wumas Habil inna-as: "Yallah a nraḥ ɣar yiyer. Ȓami ḏin iy xeccen iṭṭef Qabil ingez x wumas inɣi-ṯ.
Inna-as Arebbi i Qabil: "Mani iǧa wumac?"
Yarra-d xas inna-as: "War ssineɣ. Nec, ma ḏ aƹessas x wuma?"
Inna-as Arebbi: "Min ṯxeddmeḏ? Iḏammen n wumac aqa sɣuyun-d ɣari zi ṯmurṯ. Ȓexxu cek twaneƹƹȓeḏ x ṯmurṯ ig iswin iḏammen n wumac. Aḏ txeḏmeḏ ṯamurṯ war ḏac ticc bu ȓɣiǧeṯ. War tƹiceḏ bu ḏi ȓehna war teṭṭfeḏ bu umcan x ṯmurṯ."
