لْإِنْجِيل غَارس ثْنَاين ن يِسمَاون، قَارن-اَس لْإِنْجِيل قَّارن-اَس عَاوذ ڒْعَاهذ ذ جْذِيذ. لْإِنْجِيل ذَايس 27 ن سُّوْرَاث. سُّوْرَا وِيس عشْرَا يُوْرِي-ت سِيذْنَا بُوْلُس أُو قَّارن-اَس ثَبْرَات ن اَرَّسُوْل بُوْلُس غَار ڒْمُوْمِنِين إِي يدْجَان ذِي جْوَايه ن وفَسُوْس. ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث. مِين يعْنَا سِيذْنَا بُوْلُس؟ تُوْغَا نتَّا ذ اَئِيْسْرَائِيلِي ذ اَخْوَنْجِي، وَلَكِن يجّن ن نْهَار يژْرَا سِيذِيثْنغ عِيْسَى ذِي لْوَاحِي يكَّار بُوْلُس يُوْمن زَّايس. يݣِّي-ث أَربِّي ذ اَرَّسُوْل. سُّوْرَا-يَا ذ يجّن ن ثبْرَات إِي يُوْرَا سِيدْنَا بُوْلُس إِ ڒْمُوْمِنِين يمزْوُوْرَا إِي يدْجَان ذِي جْوَايه ن وفَسُوْس. وَار يدْجِي بُو نِثْنِي وَاهَا، يُوْرِي-ت عَاوذ إِ مَارَّا ڒْمُوْمِنِين مَانِي مَا دْجَان. وَامِي يُوْرَا ثَبْرَات-أَ اَرَّسُوْل بُوْلُس يمْكن نتَّا اَقَاث ذ اَمحْبُوْس ذݣ يِجّن ن ڒحْبس ذِي ثنْدِينْت ن رُوْمَا عْلَاحْسَاب عِيْسَى لْمَسِيح.
ذِي ثبْرَات-أَ سِيذْنَا بُوْلُس يتْشجَّاع ڒْمُوْمِنِين اَذ عِيشن يجّن ن ثُوْذَارْث يتِيشّن لْقِمَا إِ سِيذِيثْنغ عِيْسَى. ئِقَّار-اَسن عَاوذ قَا جْمَاعث ن ڒْمُوْمِنِين نتَّاث ذ دَّات ن لْمَسِيح أُو لْمَسِيح نتَّا ذ اَزدْجِيف يتْرَايَّان خ دَّات-أَ. ذِي جْمَاعث-أَ تْمُوْنن مَارَّا يِنِّي يتَامْنن ذݣ يِجّن ن دَّات. مَثَالَان نشِّين اَم يِجّن ن ڒبْنِي ذ يِجّن ن ثدَّارْث ذِي أَربِّي. ئِتْشرَّاح مَانَايَا مْلِيح ذِي سُّوْرَا-يَا ذݣ وُوْذم وِيس 2 ذِي لْأَيَا 20 غَار لْأَيَا 21 ثقَّار: ثَدَّارْث-أَ نتَّاث ثبْنَا خ دْسَاس ن يِيزْرَا يدْجَان ذ اَرُّسُل ذ لْأَنْبِيَا. أُو لْمَسِيح س يِيخف نّس اَقَاث ذ اَزْرُو نِّي يدْجَان ذݣ ومْشَان اَصبْحَان ذِي ثْغمَّارْث ن دْسَاس نّس. ذَايس ذِي نتَّا إِي يمُوْن مَارَّا ڒبْنِي ن ثدَّارْث-أَ تْݣَعَّاذ ذ يشْتن بَاش اَذ تِيڒِي ذ يجّن ن ثمْزِيذَا ذ ثَمْقدّسْت إِ أَربِّي. كْلِيكَا سْوَادَّاي بَاش اَذ تْغَرذ اَوَاڒن نّغْنِي ن أَربِّي س ثْمَازِيغْث ن أَرِّيف إِي د يُوْسِين ذِي سُّوْرَا-يَا قَّارن-اَس ثَبْرَات ن اَرَّسُوْل بُوْلُس غَار ڒْمُوْمِنِين إِي يدْجَان ذِي جْوَايه ن وفَسُوْس.
