صنّط إِ سُّوْرَا ؤُمِي قَّارن يُوْنس۔ ثسَّاوَاڒ خ ڒِيَّام ن ن سِيذْنَا يُوْنس، ثْتَرْجْم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔
غر ذَانِيتَا خ سِيذْنَا يُوْنس وَامِي ذَاس يڒَاغَا سِيذِي أَربِّي اَذ يبشَّار ثَنْدِينْت ن نِينْوَا بَاش اَذ تُوْبن زِي ڒْمُعْصِيَاث نْسن۔ مَانَايَا اَقَاث ذݣ وُوْذم وِيس 1 ن سُّوْرَا ن يُوْنس: يُوْمَر سِيذِي أَربِّي يُوْنس، ينَّا-ٱس: "كَّار، رُوح غَار ثنْدِينْت ن نِينْوَا ثَمقّْرَانْت إِي د يُوْسِين ذِي جِّيهت ن شَّرْق، ثْسِيوْضذ اَوَاڒ ينُو غَارس مِينْزِي شّرّ ن يمزْذَاغ نّس يِيْوض-اَيِي-د۔" مَاشَا يُوْنس يكَّار يرْوڒ زِي سِيذِي أَربِّي۔ أُوْشَا يهْوَا غَار ڒبْحَار ن يِج ن ثنْدِينْت ؤُمِي قَّارن يَافَا مَانِي يُوْفَا يج ن ثْغَرَّابُوْت اَذ تْرَاح غَار يِج ن ثنْدِينْت ؤُمِي قَّارن تَرْشِيش إِي د يُوْسِين ذِي جِّيهت ن لْغَرْب۔ ئِخدْجس يُوْنس اَمْشَان نّس، ئِݣَعّذ ذِي ثْغَرَّابُوت اَكذ يبَحْرِيْين مِينْزِي يخس اَذ يرْوڒ زِي سِيذِي أَربِّي۔
ڒْخدّْنِّيت يسّكّ-د سِيذِي أَربِّي يج وسمِّيض يجْهذ، ئِهْوڒ زَّايس ڒبْحَار حتَّا اَڒ مَانِي عْڒَحَاڒ اَذ ترز ثْغَرَّابُوْت۔ ݣّْوْذن يبَحْرِيْين أُو يبْذَا كُڒ يجّن زَّايْسن يسْغُوْيِيو يتتَّار س اَربِّي نّس، غضْڒن ڒحْوَايج زِي ثْغَرَّابُوْت غَار ڒبْحَار بَاش اَخَاس سْنقْسن دْقڒ۔ مَاشَا يُوْنس، نتَّا تُوْغَا-ث يطّص ذݣ وَادْجغ ن ثْغَرَّابُوْت۔ يُوْسَا-د غَارس بَاب ن ثْغَرَّابُوْت ينَّا-ٱس: "مَايمِّي ثطّْصذ؟ كَّار، ثتَّارذ س أَربِّي نّش يمْكن اَذَانغ يفكَّار حمَا وَار نتْمتِّي شَا۔" أُوْشَا نَّان إِ وَايَاوْيَا: "يَلَّاه، أَ نحْسب بَاش أَ نخْزَر وِي ذَانغ يسبّن ذِي لْبَلَا-يَا۔ ؤُمْبَعْد حسْبن يُوْسَا-د ڒحْسَاب ذݣ يُوْنس۔ نَّان-اَس: "خبَّر-اَنغ مَايمِّي ذَانغ ثحْكم لْمُوْصِيبَا-يَا؟ مَانْت ڒْخذْمث نّش؟ مَانِيس د ثُوْسِيذ؟ مَانِس ثَمُوْرْث نّش؟ ؤُݣ يدْجَان ذ ڒْݣنْس نّش؟" يَارَّا-د خَاسن: "نش زݣ يِوْذَان ن بَنِي إِسْرَائِيل۔ عبّْذغ سِيذِي أَربِّي، لْإِلَه ن وجنَّا، ونِّي إِݣ يخڒْقن ڒْبَرّ ذ ڒبْحَار۔"
ئِوْذَان نِّي ݣّْوْذن اَطَّاس اَڒْمِي ثن يخبَّر بلِّي نتَّا يرْوڒ زِي سِيذِي أَربِّي، نَّان-اَس: "مَايمِّي ثݣِّيذ مَانَايَا؟" ؤُمْبَعْد سّقْسَان-ث: "مِين ذَاش غَا نݣّ بَاش اَخَانغ يهدّن ڒبْحَار؟" مِينْزِي ڒبْحَار تُوْغَا-ث عَاذ يرنِّي ذݣ وهَاجِي۔
ينَّا-ٱسن: "يْسِيم-اَيِي نْضرم-اَيِي ذِي ڒبْحَار حمَا اَذ يهدّن، ڒَاحقَّاش نش اَقَايِي مْتيّْقن بلِّي نش ذ سَّبَاب ن ڒْبَلَا-يَا خَاوم د يمرْسن۔"
مَاشَا يوْذَان نِّي وَار ذَاس ݣِّين بُو اَرَّاي، خْسن اَذ سُوْفْغن ثَغَرَّابُوْت غَار طَّارْف ن ڒبْحَار۔ مَاشَا وَار ذَاس زمّرن شَا مِينْزِي ڒبْحَار يهْوڒ خَاسن اَطَّاس۔ أُوْشَا بْذَان سْغَاثن غَار سِيذِي أَربِّي: "آي أَربِّي، وَار ذَانغ نقّ شَا ذِي طُّوْعَث ن ثُوْذَارْث ن بْنَاذم-أَ۔ نْتتَّار-اَش عَاوذ بَاش وَار ذَانغ تْحسِّيبذ خ يذَامّن نّس مِينْزِي شك آ سِيذِي أَربِّي، ثݣِّيذ مِين ثخْسذ۔" ؤُمْبَعْد طّْفن يُوْنس نْضرن-ث ذِي ڒبْحَار، ڒْخدّْنِّيت يرْسَا ڒبْحَار۔ ݣّْوْذن يِوْذَان نِّي اَطَّاس زِي سِيذِي أَربِّي۔ طّْفن قدّْمن تضْحِيّث إِ أَربِّي أُوْشَا مْعَاهَّاذن اَكِذس۔ مَاشَا يُوْنس، يسوْجذ-اَس أَربِّي يج ن وسْڒم ذ اَمقّْرَان بَاش اَث يسغْڒِي۔ ئِكَّا يُوْنس ذݣ وعدِّيس ن وسْڒم ثڒْت-ييَّام۔
