لْإِنْجِيل غَارس ثْنَاين ن يِسمَاون، قَارن-اَس لْإِنْجِيل قَّارن-اَس ڒْعَاهذ ذ جْذِيذ. لْإِنْجِيل ذَايس 27 ن سُّوْرَاثِين. سُّوْرَا وِيس اَرْبعْطَاش يُوْرِي-ت سِيذْنَا بُوْلُس، قَّارن-اَس ثَبْرَات وِيس ثْنَاين ن اَرَّسُوْل بُوْلُس غَار ڒْمُوْمِنِين ن أَيث-سَلُوْنِيك. ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث. يُوْرِي-ت سِيذْنَا بُوْلُس غَار ڒْمُوْمِنِين يمزْرُوْرَا تُوْغَا يزدّْغن ذِي ثنْدِينْت ن سَلُوْنِيك ذِي ثْمُوْرْث ن لْيُوْنَان.
ذِي سُّوْرَا-يَا غَارْنغ شَا ن لْأَيَاث يسَّاوَاڒن خ نْهَار نِّي خْمِي د غَا يذْور سِيذِيثْنغ عِيْسَى لْمَسِيح زݣ وجنَّا غَار دُّنشْت-أَ۔ نتَاف اَوَاڒن-أَ ذݣ وُوْذم وِيس 1 ذِي لْأَيَاث 6 اَڒ 10، ثقَّار:
أَربِّي نتَّا ذ بَاب ن ڒْحَقّ، أَذ يعدّب س ڒمْحَاين يِنِّي إِي كنِّيو يتْمحَّانن، أَذَاوم يُوْش اَرَّاحث اَكِذْنغ كنِّيو يتْوَامحَّانن. مَانَايَا اَذ يِيڒِي خْمِي د غَا يمظْهَار سِيذِيثْنغ عِيْسَى زݣ وجنَّا ذݣ يِجّن ن ثْمسِّي ثْحدّق، أَكِذس د مظْهَارنْت لْمَلَائِكَاث نّس يجهْذن. أَذ ينْتَاقم زݣ يِنِّي وَار يسِّينن شَا أَربِّي ذ يِنِّي وَار يتْطِيعِين شَا إِ لْإِنْجِيل ن سِيذِيثْنغ عِيْسَى. أَذ تْوَاعَاقْبن س يِجّن ن لْخَرَاب وَار يفنِّين شَا، أَذ تْوَاحَرّْمن زݣ وغمْبُوْب ن سِيذِيثْنغ ذ لْعَظَمَا ن جّهْذ نّس. مَانَايَا اَذ يوْقع ذِي يَوْم نِّي إِي د غَا يَاس سِيذِيثْنغ بَاش اَذ يتْوَاسمْغَار جَار صَّالِحِين نّس، نتَّا اَزَّايس تْعجّْبن مَارَّا يِنِّي يُوْمْنن، ذَايْسن كنِّيو مِينْزِي ثُوْمْنم زِي مِين خَاس نشْهذ.
كْلِيكَا سْوَادَّاي بَاش اَذ تْغَرذ اَوَاڒن نّغْنِي ن أَربِّي س ثْمَازِيغْث ن أَرِّيف إِي د يُوْسِين ذِي سُّوْرَا-يَا قَّارن-اَس ثَبْرَات وِيس ثْنَاين ن اَرَّسُوْل بُوْلُس غَار أَيث-سَلُوْنِيك.
