صنّط إِ ڒبْعَاض ن لْأَيَاث زِي سُّوْرَا ؤُمِي قَّارن إِمزْوُوْرَا زݣ وُوْذم وِيس 1 اَڒ 5۔ ثسَّاوَاڒ خ أَربِّي وَامِي د يخْڒق دُّونشْت ذ ڒِيَّام ن سِيذْنَا آدَم، ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔
غر ذَانِيتَا مِين يوقْعن جَار قَبِيل ذ هَبِيل، ثَارْوَا ن سِيذْنَا آدَم ذ حَوَّا، ذݣ وُوْذم وِيس 4 زِي لَأيَا 1 اَڒ 12: ثيْسِي حَوَّا اَعدِّيس، ثجَّا-د اَحنْجِير قَّارن-اَس قَبِيل۔ أُوْشَا ثنَّا-ٱس:"س ڒمْعَوْنث ن أَربِّي جِّيغ-د اَرْيَاز۔" أَوَارْنَاس ثجَّا-د ؤُمَاس هَبِيل۔ تُوْغَا هَبِيل نتَّا ذ اَنِيتْشِي ن ڒبْهَايم، قَبِيل تُوْغَا-ث ذ اَفدْجَاح۔
أَوَارْنِي شَان وُوْسَّان يكَّار قَبِيل يكّس زِي مِين ذَاس ثُوْرو ثْمُوْرْث، ئِقَرّب زَّايس غَار أَربِّي۔ هَبِيل نتَّا عَاوذ يكَّار يطّف زِي ڒبْهَايم نّس أُوْشَا يغَرص زِي مِين غَارس يدْجَان ذ اَصبْحَان يقَرّب زَّايس غَار أَربِّي۔ ئِقْبڒ أَربِّي ڒهْدِيّث ن هَبِيل أُو يَارْضَا خَاس۔ مَاشَا قَبِيل ذ ڒهْدِيّث نّس وَار ثن يقْبِيڒ شَا۔ أُوْشَا يخيّق قَبِيل اَطَّاس حتَّا اَڒ مَانِي يغيَّر ذݣ وغمْبُوْب نّس۔ ئِسّقْسَا-ث أَربِّي: "مَايمِّي ثْخيّْقذ؟ مَايمِّي يغيَّر وغمْبُوْب نّش؟ مَا يدْجَا ثݣِّيذ مِين يصبْحَان اَذ تْربْحذ، مَا يدْجَا وَار ثݣِّيذ مِين يصبْحَان اَذ تَافذ تْرَاجَا-شك ڒْمُعْصِيّث۔ ڒْمُعْصِيّث نِّي ثْخس اَخَاك ثحْكم مَاشَا يتْخصَّا-شك اَخَاس ثْحكْمذ۔"
- ئِسِّيوڒ قَبِيل اَكذ وُوْمَاس هَبِيل ينَّا-ٱس: "يَلَّاه أَ نْرَاح غَار يِيْير۔ ڒَامِي ذِين إِي خشّن يطّف قَبِيل ينْݣز خ وُوْمَاس ينْغِي-ث۔
- ينَّا-ٱس أَربِّي إِ قَبِيل: "مَانِي يدْجَا وُوْمَاش؟"
- يَارَّا-د خَاس ينَّا-ٱس: "وَار سِّينغ۔ نش، مَا ذ اَعسَّاس خ وُوْمَا؟"
- ينَّا-ٱس أَربِّي: "مِين ثْخدّْمذ؟ ئِذَامّن ن وُوْمَاش اَقَا سْغُوْيُوْن-د غَارِي زِي ثْمُوْرْث۔ ڒخُّو شك تْوَانعْڒذ خ ثْمُوْرْث إِݣ يسْوِين يذَامّن ن وُوْمَاش۔ أَذ تْخذْمذ ثَمُوْرْث وَار ذَاش تِيشّ بُو ڒْغِيدْجث۔ وَار تْعِيشذ بُو ذِي ڒهْنَا وَار تطّْفذ بُو ومْشَان خ ثْمُوْرْث۔"
