ثوذارث ن سيذنا يوسف س ثمازيغث ن أرّيف (ثريفيث)


صنّط إِ ڒبْعَاض ن لْأَيَاث زِي سُّوْرَا ؤُمِي قَّارن إِمزْوُوْرَا زݣ وُوْذم وِيس 37 اَڒ 50۔ ثسَّاوَاڒ خ ڒِيَّام ن سِيذْنَا يُوْسف، ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔


غر ذَانِيتَا خ ثِيرْجَا ن سِيذْنَا يُوْسف إِي يُوْرْجَا خ اَيثْمَاس ذ بَابَاس ذ يمَّاس۔ مَانَايَا اَقَاث ذݣ وُوْذم وِيس 37 زِي لْأَيَا 1 اَڒ 11: تُوْغَا سِيذْنَا يَعْقُوْب يزْذغ ذِي ثْمُوْرْث ن كَنْعَان مَانِي يمُّوْث بَابَاس إِسْحَق ذ جدّس سِيذْنَا بْرَاهِيم۔ (أُو سِيذْنَا يَعْقُوْب تُوْغَا غَارس اَبْبعَا ن ثمْغَارِين ذ ثنْعَاش ن يحنْجِيرن۔)



يُوْسف، (ذ يجّن زݣ يحنْجِيرن نّس)، وَامِي تُوْغَا غَارس سْبَعْطَاش ن يسݣّْوُوْسَا تُوْغَا يتْرَاح، ئِتْرَاسّ ڒبْهَايم اَكذ اَيثْمَاس يمقّْرَانن زِي بَابَاس۔ أُو نتَّا تُوْغَا يتْعَاوَاذ خَاسن ڒخْبَار وَار يحْڒِين إِ بَابَاس۔



تُوْغَا سِيذْنَا يَعْقُوْب يعِيزّ خَاس يُوْسف اَطَّاس خ مَارَّا يحنْجِيرن نّس (مِينْزِي نتَّا ذ مِّيس اَمزْوَارُو ن ثمْغَارْث خَاس يعِيزّن)، أُو مَانَايَا إِي ث يجِّين يُوْشَا-ٱس ثَقْمِيجَات ذ جْذِيذ۔ نْهَار وَامِي ژْرِين يُوْسف يعِيزّ اَطَّاس خ بَابَاس، شَرْهن-ث أُوْشَا تُوْغَا وَار زمّرن اَكِذس سِّوْڒن س وَاوَاڒ يصبْحَان۔



ئِج ومُوْر يُوْسف يُوْرْجَا يج ن ثرْجِيث، أُو يعَاوذ-يت إِ اَيثْمَاس، أُوْشَا رنِّين شَرْهن-ث كْتَار۔ نتَّا ينَّا-ٱسن: "سْحسّم غَارِي۔ قَا ثَرْجِيث-أَ إِي ؤُرْجِيغ: ژْرِيغ اَخْمِي نشِّين نتْشدَّا ثِقثْنِين ن يمنْدِي ذݣ يِيْير۔ شْوَاي شْوَاي، أَخْمِي ثَقتُّوْنْت ينُو ن يمنْدِي ثْبدّ نِيشَان أُو ثِقثْنِين نْوم نّْضنْت-اَس، سجّْذنْت-اَس۔"



نَّان-اَس اَيثْمَاس: "مَا ثْفكَّارذ شك اَخَانغ ثْحكْمذ؟" أُوْشَا رنِّين عَاذ شَرْهن-ث عْلَاحْسَاب ن ثرْجِيث نّس ذ وَاوَاڒن نّس۔




يُوْرْجَا عَاوذ يج ن ثرْجِيث نّضْنِيت، يعَاوذ-يت إِ اَيثْمَاس، ينَّا-ٱسن: "نش ؤُرْجِيغ يج ن ثرْجِيث اَخْمِي ثْفُوْشْت ذ ثْزِيرِي ذ حِطَاش ن يِيثْرَان مَارَّا إِذْسن سجّْذن-اَيِي۔" ؤُمْبَعْد يعَاوذ-يت إِ بَابَاس ذ اَيثْمَاس مَارَّا۔ ينَّا-اَس بَابَاس: "مَانَا ثَرْجِيث-أَ إِي ثُوْرْجِيذ؟ مَا تْفكَّارذ س ثِيذت نش ذ يمَّاش ذ اَيثْمَاش اَغَارك د نَاس بَاش اَذَاش نْسجّذ؟" أُوْشَا حسْذن-ث اَيثْمَاس اَطَّاس خ مَانَايَا، مَاشَا بَابَاس يقِّيم يتْفكَّار ذِي مَانَاوِيَا۔