لْإِنْجِيل غَارس ثْنَاين ن يِسمَاون، قَارن-اَس لْإِنْجِيل قَّارن-اَس ڒْعَاهذ ذ جْذِيذ. لْإِنْجِيل ذَايس 27 ن سُّوْرَاثِين. سُّوْرَا وِيس حِيطَاش يُوْرِي-ت سِيذْنَا بُوْلُس، قَّارن-اَس ثَبْرَات ن اَرَّسُوْل بُوْلُس غَار ڒْمُوْمِنِين ن أَيث-فِيلِيپَّـاس. ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث. سِيذْنَا بُوْلُس مِين يعْنَا ؟ تُوْغَاث نتَّا ذ اَئِيْسْرَائِيلِي ذ اَخْوَنْجِي، وَلَكِن يجّن ن نْهَار يژْرَا سِيذِيثْنغ عِيْسَى ذِي لْوَاحِي يكَّار يُوْمن زَّايس. يݣِّي-ث أَربِّي ذ اَرَّسُوْل. سُّوْرَا-يَا نتَّاث ذ يجّن ن ثبْرَات يُوْرِي-ت سِيدْنَا بُوْلُس إِ جْمَاعث ثَمزْوَارُوْت ن ڒْمُوْمِنِين ن عِيْسَى لْمَسِيح ذݣ أُوْرُوْپَا. أَقَاثن ذِي ثنْدِينْت ن فِيلِيپَّـاس ذِي ثْمُوْرْث ن لْيُوْنَان. مَاشِي نِثْنِي وَاهَا، يُوْرِي-ت سِيذْنَا بُوْلُس إِ مَارَّا ڒْمُوْمِنِين مَانِي مَا دْجَان. وَامِي يُوْرَا ثَبْرَات-أَ اَرَّسُوْل بُوْلُس تُوْغَاث ذ اَمحْبُوْس ذݣ يِجّن ن ڒحْبس عْلَاحْسَاب عِيْسَى لْمَسِيح.
ذِي ثبْرَات-أَ يتْشجَّاع ڒْمُوْمِنِين اَذ فَرْحن س سِيذِيثْسن مَامش مَا دْجَانْت ظُّرُوْف نْسن. وَاخَّا نتَّا ذ اَمحْبُوْس يزيَّر خَاس ڒْحَاڒ، تُوْغَا يزمَّر اَذ يفَرح وَامِي يݣَّا تِّقث نّس ذِي أَربِّي. ذِي ثبْرَات-أَ ثَانِيتَا يتْوصَّا سِيذْنَا بُوْلُس ڒْمُوْمِنِين مَامش غَا إِي ݣّن إِ ڒْعَاذْيَان نْسن إِي ذَاسن تْعرَّاضن خ لْإِيمَان. ئِتْوصَّا-ثن عَاوذ مَامش غَا صڒْحن اَمنْغِي جَارَاسن ذِي جْمَاعث نْسن. ئِتخصَّا لَابُد اَغَارْنغ يِيڒِي اَرَّاي اَم ونِّي ن سِيذِيثْنغ عِيْسَى. مَانَايَا اَقَاث ذݣ وُوْذم وِيس 2 ن ثبْرَات-أَ ذِي لْأَيَا 5 حتَّا لْأَيَا ن 7 اَڒ ثْسَاونْت: أَرَّاي نْوم يتْخصَّا اَذ يِيڒِي اَم اَرَّاي ن عِيْسَى لْمَسِيح. نتَّا اَقَاث ذ صِّفث ن أَربِّي، وَلَكِن وَامِي يمْقُدَّا اَك أَربِّي وَار ينْوِي شَا اَذ يطّف ذِي مَانَاينِّي. لَّا، نتَّا يَارَّا يخف نّس ذ وَالُو يطّف يجّن ن صِّفث اَم يِيسْمغ، يعْنِي يخْڒق-د اَم صِّفث ن بْنَاذم. كْلِيكَا سْوَادَّاي بَاش اَذ تْغَرذ اَوَاڒن نّغْنِي ن أَربِّي س ثْمَازِيغْث ن أَرِّيف إِي د يُوْسِين ذِي سُّوْرَا-يَا قَّارن-اَس ثَبْرَات ن اَرَّسُوْل بُوْلُس غَار ڒْمُوْمِنِين ن أَيث-فِيلِيپَّـاس.
