صنّط إِ ڒبْعَاض ن لْأَيَاث زِي سُّوْرَا ؤُمِي قَّارن إِمزْوُوْرَا زݣ وُوْذم وِيس 6 اَڒ 9۔ ثسَّاوَاڒ خ أَربِّي وَامِي يمْحَا يوْذَان خ ثْمُوْرْث ذِي ڒِيَّام ن سِيذْنَا نُوْح، ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔
غر ذَانِيتَا خ وغَرَّابُو يݣَّا سِيذْنَا نُوْح عْلَاحْسَاب اَوَاڒ ن أَربِّي، ذݣ وُوْذم وِيس 6 زِي لْأَيَا 11 اَڒ 22: ئِكْثَار شّرّ ذ لْفَسَاد ذ يمنْغَان خ ثْمُوْرْث قِيبَاتْش إِ أَربِّي۔ تُوْغَا خْمِي يخزَّر أَربِّي غَار ثْمُوْرْث يتْوَاڒَا-ت ثْعمَّر س لْفَسَاد ڒَاحقَّاش تُوْغَا يوْذَان مَارَّا فّْغن اَبْرِيذ۔ ينَّا-ٱس أَربِّي إِ نُوْح: "يُيْوض وكمَّاڒ ن مَارَّا مِين يدَّرن ذِي دُّوْنشْت ڒَاحقَّاش يوْذَان شُّوْرن ثَمُوْرْث س يمنْغَان۔ عْلَاحْسَاب مَانَايَا اَثن مْحِيغ نِثْنِي ذ ثْمُوْرْث۔ اݣّ إِ يِيخف نّش يج وغَرَّابُو س وكشُّوْض ن ڒْشجُّوْر إِي صبْحَان، ثݣّذ اَغَرَّابُو ذ ثِزدَّاغ، دْهن-يث س بَرَّا ذ ذَاخڒ س ثِيزفْث۔ هَا مَامش ذَاس غَا ثݣّذ: اݣّ ذَايس مِيَّا أُو خمْسِين مِيتْرُو ذِي ثُوْزݣَّارْث، خمْسَا أُو عِشْرِين مِيتْرُو ذِي ثِيرِيوْت، خمّسْطَاش مِيتْرُو ذِي ڒُوْعْڒَا۔ اݣّ ثِزقَّا ن وغَرَّابُو ثجّذ تَمَان ن وزْين مِيتْرُو جَار ثْزقَّا ذ سَّرْجم، اݣّ خ يِج ن جِّيهت ثَوَّارْث۔ ثݣّذ ذَايس ثْڒَاثَا ن ثْزدَّاغ يشْتن خ ثنّغْنِيت۔ نش اَقَا ݣُّوْرغ اَذ سّكّغ ڒْفَيَضَان ن وَامَان غَار ثْمُوْرْث بَاش اَذ قْضِيغ مَارَّا ؤُو يدْجَا اَرُّوْح، ذ مَارَّا مِين يدْجَان خ ثْمُوْرْث اَذ يمّث۔ مَاشَا شك، أَكِش ݣّغ ڒْعَهذ أُوْشَا اَذ تَاذْفذ غَار وغَرَّابُو شك، ذ ثَارْوَا نّش، ذ ثمْغَارْث نّش، ذ ثمْغَارِين ن ثَارْوَا نّش۔
ئِتْخصَّا-شك اَكِذش ثْسِيذْفذ ذݣ وغَرَّابُو ثِيُوْيَا زِي مَارَّا لْحَيَوَان اَوْثم ذ ثوْثمْت، حمَا اَذ قِّيمن ؤُڒَا ذ نِثْنِي يدَّرن۔ ثَاوِيذ اَكِذش زِي مَارَّا لْمَكْلَا يتْوَاشّن، خمّڒ-يت غَارك حمَا اَذ تِيڒِي ذ لْمَكْلَا إِ شك ذ لْحَيَوَان۔" أُوْشَا يݣَّا نُوْح مَارَّا س مِين زِي ث يُوْمَر سِيذِي أَربِّي۔
