لْإِنْجِيل غَارس ثْنَاين ن يِيسْمَاون، قَّارن-اَس لْإِنْجِيل قَّارن-اَس عَاوذ ڒْعَاهذ ذ جْذِيذ۔ لْإِنْجِيل ذَايس 27 ن سُّوْرَاث۔ سُّوْرَا وِيس سبْعَا يُوْرِي-ت سِيذْنَا بُوْلُس أُو قَّارن-اَس ثَبْرَات ثَمزْوَارُوْت ن اَرَّسُوْل بُوْلُس غَار ڒْمُوْمِنِين زِي أَيث-كُوْرِينْث۔ ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔ مِين يعْنَى سِيذْنَا بُوْلُس؟ تُوْغَا نتَّا ذ اَئِسْرَائِيلِي ذ اَخْوَانْجِي، وَلَكِن يجّن ن نْهَار يژْرَا سِيذِيثْنغ عِيْسَى ذِي لْوَاحِي يكَّار بُوْلُس يُوْمن زِي سِيذِيثْنغ عِيْسَى۔ يݣِّي-ث أَربِّي ذ اَرَّسُوْل۔ سُّوْرَا-يَا ذ يجّن ن ثبْرَات إِي يُوْرَا سِيذْنَا بُوْلُس إِ ڒْمُوْمِنِين يمزْوُوْرَا زِي ثنْدِينْت ن كُوْرِينْث ذِي ثْمُوْرْث ن لْيُوْنَان۔ يُوْرَا ذَايس سِيذْنَا بُوْلُس خ لْقُدْرَاث رُوْحِيَاث إِݣ يتِيشّ أَربِّي إِ ڒْمُوْمِنِين حمَا اَثن يسجْهذ ذِي لْإِيمَان۔ يُوْرَا خ مَامش إِي ثنْت غَا نْسخْذم ذ مَامش وَار ثنْت نسْخدِّيم شَا۔ يُوْرَا خ ڒمْڒَاش أُو عَاوذ خ مَامش ثدْجَا لْعِبَادَا ن يرْيَازن ذ ثمْغَارِين۔ يُوْرَا خ ڒْخذْمث ن اَرُّسُل ذ ڒْحَقّ ن شَّرْض إِي غَارْسن غَار يِنِّي يخدّْمن عْلَاحْسَاب لْإِنْجِيل۔ يُوْرَا اَرَّسُوْل بُوْلُس ذِي سُّوْرَا-يَا ذݣ وُوْذم وِيس 13 خ يِجّن ن وبْرِيذ يدْجَان يُوْعْڒَان زِي مَارَّا يبْرِيذن - يعْنِي اَبْرِيذ ن ڒمْحِبّث۔ سُّوْرَا-يَا وِيس 13 نتَّاث مَعْرُوْفَا اَطَّاس أُو ذ ثَصبْحَانْت ذِي لْإِنْجِيل۔ ذݣ وُوْذم وِيس 15، يُوْرَا سِيذْنَا بُوْلُس خ لْقِيَامَا ن لْمَسِيح إِݣ يݣَّا ذ لْقِيَامَا ن يمتِّينن ذِي نْهَار اَنݣَّارُو۔ أَرَّسُوْل بُوْلُس يُوْرَا عَاوذ خ لْمَشَاكِيل ذِي جْمَاعْث ن ڒْمُوْمِنِين يعْنِي ڒْمُعْصِيَاث نْسن ذ لْخِلَافَاث جَارَاسن۔ خْزَر اَڒ وَادَّاي بَاش اَذ تژرذ تَّرْجَامَا ن وُوْذم وِيس 13 س ثْمَازِيغْث ن أَرِّيف۔ أَڒ وَادَّاي ن وَاوَاڒن نِّي، كْلِيكَا خ رَّوَابِيط ذِي لْمِلْفَاث بي دي اف بَاش اَذ تغرذ مَارَّا اَوَاڒن ن أَربِّي إِي د يُوْسِين ذِي سُّوْرَا-يَا قَّارن-اَس ثَبْرَات ثَمزْوَارُوْت ن اَرَّسُوْل بُوْلُس غَار ڒْمُوْمِنِين زِي أَيث-كُوْرِينْث۔
أَبْرِيذ إِي يدْجَان يُوْعْڒَان قَاع زِي مَارَّا
1 مَعْلِيك سَّاوَاڒغ س يِيڒسَاون ن يثَرَّاسن س لُّغَا،
مَعْلِيك سَّاوَاڒغ س لُّغَا ن لْمَلَائِكَاث يعْنِي رُوْحِيَا،
مَاشَا نش ڒمْحِبّث وَار غَارِي تِيڒِي شَا،
إِڒِي نش تْسدَّاعغ اَم يِج ن دَرْبُوْݣَا،
إِڒِي نش تمْقرْقَابغ اَم ڒْقَرْقُوْب وَاهَا.
2 نش مَعْلِيك غَارِي لْقُدْرَا اَذ سِّيوْڒغ اَم لْأَنْبِيَا،
مَعْلِيك فهْمغ مَارَّا مِين ينُوْفَّرن ذ مَارَّا ثُوْسْنَا،
مَعْلِيك سْخدَّامغ لْإِيمَان حمَا اَذ سْمُوْتِّيغ يذُوْرَار-أَ،
إِڒِي ذ وَالُو إِي دْجِيغ مڒَا نش وَار تْحِبِّيغ شَا.
3 نش مَعْلِيك صدْقغ مَارَّا مِين غَارِي ذ اَݣْڒَا،
مَعْلِيك سلّْمغ يخف ينُو اَذ حرْقن دَّات-أَ،
إِڒِي وَار ربْحغ وَالُو مڒَا وَار تْحِبِّيغ شَا.
4 ڒمْحِبّث ذَايس تِّسَاع ن ڒْخَاضَر، ذَايس يج ن لْحَنَانَا.
ڒمْحِبّث وَار تفْتَخَر وَار ثْحسّذ شَا.
وَار ذَايس تَّكبُّر، 5 أَقَا نتَّاث تْسذْحَا.
وَار ثْرزُّو شَا خ مِين ثنْوَا نتَّاث وَاهَا.
وَار يسْهِيڒ اَذ تْعصّب، مڒَا عْصَان-ت تتُّو ذغْيَا.
6 وَار ثْفَرّح شَا زِي شّرّ، ثْفَرّح زِي لْحَقِيقَا.
7 وَار ثْفطَّاح عمَّارْص. تَامن شْحَاڒ مَا ثكَّا.
ثْصبَّر خ مَارَّا مِين يدْجَان. س لْأَمَال ڒبْدَا تْمنَّا.
8 ڒمْحِبّث-أَ نتَّاث عمَّارْص اَذ تقْضَا،
مَاشَا اَذ نْتَاهَان وَاوَاڒن ن لْأَنْبِيَا،
ئِڒسَاون ن يثَرَّاسن وَار تْغِيمِن شَا ذ لُّغَا،
لْمَعْرِيفَا اَذ تْوَاكمّڒ يعْنِي ثُوْسْنَا.
9 أَقَا مِين نسّن مَاشِي يكْمڒ مَانَايَا،
مِين نسَّاوَاڒ نشِّين لْأَنْبِيَا ذ ؤُنْقِيص إِݣ يدْجَا.
10 مِين يدْجَان قَاع يكْمڒ خْمِي د غَا يبَان ذَانِيتَا،
سّنِّي مِين يدْجَان ذ ؤُنْقِيص اَذ يودَّر نتَّا.
11 وَامِي نش تُوْغَايِي ذ اَسيْمِي وَاهَا،
أَمشْنَاو اَسيْمِي سِّيوْڒغ اَم نتَّا،
أَمشْنَاو اَسيْمِي فكَّارغ اَم وَانِيتَا،
أَمشْنَاو اَسيْمِي وَار تْميِّيزغ س لْفِكْرَا.
نش وَامِي ذوْڒغ ذ اَرْيَاز بَعْدَا،
سمْحغ ذݣ يبْرِيذن ن وسيْمِي-يَا.
12 أَقَا ڒخُّو نْخزَّر ذݣ يِج ن ثِيسِيث وَار ثصْفِي شَا،
مَاشَا منْبَعْد أَ نمْژر مْلِيح قَارَا ذِي قَارَا.
ڒخُّو مِين سّْنغ ذ ؤُنْقِيص إِݣ يدْجَا،
منْبَعْد اَذ سّْنغ نش ثِمسْڒَايِين مَارَّا،
كِيف-كِيف مَامّش تْوَاسّْنغ نش ذَانِيتَا.
13 أَقَاثن ڒخُّو قِّيمن ثْڒَاثَا-يَا:
لْإِيمَان ذ لْأَمَال ذ ڒمْحِبّث يِنَا.
مَاشَا زِي يِنَا ذَايْسن ڒمْحِبّث إِي يدْجَان ثُوْعْڒَا.
