حَنّا: يمّاس ن سيذنا صمويل س ثمازيغث ن أرّيف (ثريفيث)

صنّط إِ ڒبْعَاض ن لْأَيَاث زِي سُّوْرَا ؤُمِي قَّارن لْكِتَاب اَمزْوَارُو ن صَمْوِيل۔ ثسَّاوَاڒ خ ڒِيَّام ن حَنَّا أُو ذ مِّيس سِيذْنَا صَمْوِيل، ثْتَرْجْم ذَانِيتَا س ثْمَازِيغْث ن أَرِّيف، يعْنِي ثَرِيفِيث۔

غر ذَانِيتَا خ سِيذْنَا صَمْوِيل وَامِي تُوْغَا-ث ذ اَحنْجِير يڒَاغَا-يَاس-د سِيذ أَربِّي حمَا اَذ يِيڒِي ذ نَّبِي۔ مَانَايَا اَقَاث ذِي لْكِتَاب اَمزْوَارُو ن صَمْوِيل ذݣ وُوْذم وِيس 3: ئِخدّم صَمْوِيل إِ أَربِّي سْوَادَّاي ن ڒْأَمر ن عَلِي۔ تُوْغَا قْلِيل خْمِي يسَّاوَاڒ أَربِّي اَكذ بْنَاذم نِغ اَذَاس د يسظْهَار شَان رُؤْيَا ذݣ وُوْسَّان نِّي۔

عَلِي ڒفْقِيه يبْذَا يتْذوَّاڒ ذ اَضَرْغَاڒ، تُوْغَا-ث يطّص ذݣ ومْشَان نّس ن ڒبْدَا۔ صَمْوِيل تُوْغَا-ث يطّص ذݣ ومْشَان يتْوَاقدّْسن مَانِي يدْجَا صّنْدُوْق إِي ذِي دْجَانْت عشْرَا ن ڒُوْصِيَاث إِي د يُوْوِي سِيذْنَا مُوْسَى۔ غَار ڒفْجَڒ، أَڒَامِي ڒْقدْدِيڒ ن ومْشَان يتْوَاقدّْسن تُوْغَا-ث عَاذ يشعّڒ، ئِڒَاغَا-د أَربِّي خ صَمْوِيل أُوْشَا يَارَّا خَاس: "وَاه، آ سِيذِي۔" ئِقْڒع غَار عَلِي ينَّا-ٱس: "ثْڒَاغِيذ-اَيِي-د، أَقَايِي۔"

ينَّا-ٱس عَلِي: "نش وَار ذَاش د ڒَاغِيغ شَا، ذْوڒ اَذ تطّْصذ۔" ئِرُوْح صَمْوِيل اَذ يطّص۔

ئِڒَاغَا-د أَربِّي اَمُوْر وِيس ثْنَاين خ صَمْوِيل، ئِكَّار يرُوْح غَار عَلِي: "أَقَايِي ؤُسِهغ-د ڒَاحقَّاش ثْڒَاغِيذ-اَيِي-د۔"

ئِجَاوب-يث: "نش وَار ذَاش د ڒَاغِيغ شَا، آ وُلِيدِي۔ ذْوڒ اَذ تطّْصذ۔"

تُوْغَا-ث صَمْوِيل عَاذ وَار يسِّين أَربِّي، تُوْغَا-ث عمَّارْص وَار غَارس د يسِّيوڒ۔ أُوْشَا يڒَاغَا-يَاس أَربِّي وِيس ثڒْث-مَارَّاث، ئِكَّار يرُوْح غَار عَلِي ينَّا-ٱس: "أَقَايِي ؤُسِيغ-د ڒَاحقَّاش ثْڒَاغَاذ-اَيِي-د۔"

ڒْخدّْنِّيت يسّن عَلِي بلِّي ذ أَربِّي إِي تُوْغَا د يتْڒَاغَان إِ وحنْجِير نِّي۔ ينَّا-ٱس: "رُوْح، أَذ تطّْصذ۔ مڒَا يڒَاغَا-يَاش-د أَربِّي، أَذ تِينِيذ: سِيوڒ آي أَربِّي، ڒْعَبْذ نّش يتسْڒَا۔" ئِرُوْح يطّص ذݣ ومْشَان نّس۔

ئِڒَاغَا-د أَربِّي اَمَامّش تُوْغَا يݣَّا س قْبڒ: "آ صَمْوِيل، آ صَمْوِيل۔"

يَارَّا خَاس: "سِيوڒ، ڒَاحقَّاش ڒْعَبْذ نّش يتسْڒَا۔"

ينَّا-ٱس أَربِّي: "أَقَاث اَذ د يَاس يج ن نْهَار اَذ ݣّغ إِ يِوْذَان ن بَنِي إِسْرَائِيل شَان ثْمسْڒَايِين ذ ثِعفَّانِين، مَارَّا يِنِّي غَا خَاس يسْڒَان اَذ تْعجّْبن۔ ذِي نْهَار نِّي اَذ ݣّغ مَارَّا مِين تُوْغَا ذَاس نِّيغ إِ عَلِي۔ أُو تُوْغَا نِّيغ-اَس بلِّي اَذ عقّْبغ فَمِيلْيَا نّس إِ ڒبْدَا ڒَاحقَّاش ثَارْوَا نّس نَّان ثِمسْڒَايِين ذ ثِعفَّانِين خَافِي، وَار ذَايِي وقَّرن شَا۔ عَلِي تُوْغَا يسّن بلِّي تݣّن دْنُوْب مَاشَا وَار ثن يسْبدّ شَا۔ خ مَانَاوِيَا جَّادْجغ إِ ثدَّارْث نّس بلِّي دْنُوْب نْسن وَار غَارْسن بُو عدُّوْڒ وَاخَّا قدّْمن تَضْحِيَاث أُو قَرّْبن-د زَّايْسنْت غَارِي۔

صَمْوِيل يقِّيم ذِي ثَاسُّوْث حتَّا اَڒ صْبَاح أُوْشَا يكَّار يرْزم ثِوُّوْرَا ن ومْشَان يتْوَاقدّْسن۔ يݣّْوذ اَذَاس يِينِي إِ عَلِى مِين يژْرَا ذِي رُؤْيَا۔ عَلِي يڒَاغَا-يَاس-د: "آ صَمْوِيل، آ وُلِيدِي۔"

يَارَّا خَاس: "وَاه، آ سِيذِي۔"

"مِين ذَاش ينَّا أَربِّي؟ وَار خَافِي سْنُوْفَّار وَالُو۔ أَش يعقّب أَربِّي مڒَا وَار ذَايِي ثنِّيذ مَارَّا مِين ذَاش ينَّا۔" أُوْشَا يعَاوذ-اَس مَارَّا، وَار يجِّي ؤُڒَا ذ يج ن ڒْحَاجث وَار ذَاس ت يِينِي۔

عَلِي ينَّا: "نتَّا ذ أَربِّي، أَذ يݣّ مِين يتْوَاڒَا نِيشَان۔"

ڒَامِي إِڒَا يتمْغَار صَمْوِيل أَربِّي تُوْغَا-ث اَكِذس۔ مَارَّا مِين ينَّا يَارِّي-ث يفّغ نِيشَان۔ مَارَّا يوْذَان ن بَنِي إِسْرَائِيل زِي ثنْدِينْت ن دَان ذِي شَّمَال غَار وَانُو ن سبْعَا ذِي لْجَنُوْب سّْنن بلِّي صَمْوِيل نتَّا ذ نَّبِي ن أَربِّي س ثِيذت۔ أَربِّي يقِّيم يتْمظْهَار-اَس-د إِ صَمْوِيل اَطَّاس ن يمُوْرن ذِي شِيلُوْح، ئِسِّيوڒ-د غَارس۔ أُو مڒْمِي تُوْغَا صَمْوِيل يسَّاوَاڒ، مَارَّا يوْذَان سْحسَّان غَارس۔

أرسل لنا تعليقاتك أو أسئلتك