ڒخْذَايم ن أرُّسُل س ثْمَازِيغْث ن أَرِّيف (ثَرِيفِيث)

لْإِنْجِيل غَارس ثْنَاين ن يِيسمَاون، قَّارن-اَس لْإِنْجِيل قَّارن-اَس عَاوذ ڒْعَهذ ذ جْذِيذ۔ لْإِنْجِيل ذَايس 27 ن سُّوْرَاث۔ سُّوْرَا وِيس خمْسَا يُوْرِي-ت سِيذْنَا لُوْقَا أُو قَّارن-اَس ڒخْذَايم ن اَرُّسُل۔ ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث (سُّوْرَا وِيس ثْڒَاثَا يُوْرِي-ت عَاوذ سِيذْنَا لُوْقَا)۔ مِين يعْنَا سِيذْنَا لُوْقَا؟ نتَّا ذ يجّن زِي ڒْمُوْمِنِين يمزْوُوْرَا ن سِيذْنَا عِيسَى۔ نتَّا ذ اَضْبِيب ذ اَمدُّوكڒ ن اَرَّسُوْل بُوْلُس، ئِتْسَافَر اَكِذس ذِي ڒْخذْمث نّس۔ أَطًّاس زِي مِين يوقْعن ذِي سُّوْرَا-يَا يوْقع-اَسن عَاوذ إِ سِيذْنَا لُوْقَا ذ اَرَّسُوْل بُوْلُس۔ ذِي ڒخْذَايم ن اَرُّسُل يتْعَاوَاذ مِين ذَاسن يوقْعن إِ ڒْمُوْمِنِين يمزْوُوْرَا إِݣ يُوْمْنن زِي سِيذْنَا عِيسَى زِي سِّين اَڒ ثْسَاونْت منْبَعْد إِ وَامِي د يكَّار زِي ڒْموْث يتْوَارْفع غَار وجنَّا۔ ذِي لْأَيَاث إِي د يُوْسِين ڒخُّو أَ نْژر مِين يوقْعن جَار سِيذْنَا عِيسَى ذ يمحْضَارن نّس وَامِي يتْوَارْفع غَار وجنَّا زَّاث نْسن۔ ثسَّاوَاڒ خَاس سُّوْرَا-يَا ذݣ وُوْذم وِيس 1 زِي لْأَيَا 8 اَڒ 11: مَاشَا اَخْمِي خَاوم غَا د يهْوَا أَرُّوح يقدّْسن، أَغَارْوم يِيڒِي جّهْذ۔ أَخَافِي ثْشهْذم ذِي ثنْدِينْت ن لْقُدْس ذ مَارَّا ثَمُورْث ن يَهُوذِيَا ذ سَمَارْيَا اَڒ طَّارْف ن دُّونشْت۔ وَامِي يكمّڒ عِيسَى اَوَاڒ نّس، ئِتْوَارْفع غَار وجنَّا۔ قِّيمن خزَّرن ذَايس، يودَّار-اَسن ذݣ وسيْنُو۔ قِّيمن خزَّرن مْلِيح وَامِي يُوڒِي غَار وجنَّا، عْلَغَفْلَا ؤُفِين ثْنَاين يثَرَّاسن بدّن اَكِذْسن غَارْسن اَرُّوض ذ اَشمْڒَاڒ۔ نَّان-اَسن: "آي يوْذَان ن ثْمُورْث ن لْجَلِيل، مَايمِّي ذَا ثْبدّم ثْخزَّرم غَار وجنَّا؟ عِيسَى وَانِيتَا إِي ذَاوم يتْوَارْفْعن غَار وجنَّا، أَمشْنَاو مَامّش ثژْرِيم يُوڒِي غَار وجنَّا، أَمنِّي إِي د غَا يَاس۔" غر نِغ صنّط سْوَادَّاي إِ وَاوَاڒن نّغْنِيت ن أَربِّي إِي د يُوْسِين ذِي سُّوْرَا ن ڒخْذَايم ن اَرُّسُل۔

أرسل لنا تعليقاتك أو أسئلتك