لْإِنْجِيل غَارس ثْنَاين ن يِسمَاون، قَارن-اَس لْإِنْجِيل قَّارن-اَس عَاوذ ڒْعَاهذ ذ جْذِيذ. لْإِنْجِيل ذَايس 27 ن سُّوْرَاث. سُّوْرَا وِيس تسْعَا يُوْرِي-ت سِيذْنَا بُوْلُس أُو قَّارن-اَس ثَبْرَات ن اَرَّسُوْل بُوْلُس غَار ڒْمُوْمِنِين إِي يدْجَان ذِي ݣَلَاطْيَا. ثْتَرْجم ذَانِيتَا س ثْمَازِيغْث ن أَرِّيف، يعْنِي ثَرِيفِيث. مِين يعْنَا سِيذْنَا بُوْلُس؟ تُوْغَا نتَّا ذ اَئِيْسْرَائِيلِي ذ اَخْوَنْجِي، وَلَكِن يجّن ن نْهَار يژْرَا سِيذِيثْنغ عِيْسَى ذِي لْوَاحِي يكَّار بُوْلُس يُوْمن زَّايس. يݣِّي-ث أَربِّي ذ اَرَّسُوْل. سُّوْرَا-يَا ذ يجّن ن ثبْرَات إِي يُوْرَا سِيدْنَا بُوْلُس إِ ڒْمُوْمِنِين يمزْوُوْرَا إِي يدْجَان ذِي لْإِقْلِيم ن ݣَلَاطْيَا. جْوَايه نِّي اَقَاث ذِي تُوْرْكْيَا نْهَار ن يِيضَا.
ذِي ثبْرَات-أَ يُوْرَا سِيذْنَا بُوْلُس خ مَامّش غَا. فهْمن ڒْمُوْمِنِين شَّرِيعَا ن مُوْسَى. ئِقَّار-اَسن إِ ڒْمُوْمِنِين بلِّي مَاشِي لَابُد اَذ ذفَّارن لْعَادَاث ذ تَّقَفَا إِي ذَايس. ثِمسْڒَايِين نّغْنِي إِي ذَايس ذِي شَّرِيعَا اَم لْقَوَانِين نِّي إِي سَّاوَاڒن خ شّرّ نِغ ذ مِين يدْجَان ذ اَصبْحَان نِثنْتِي عَاذ مُوْهِمِين اَثن فهْمن س نُّوْر ن لْمَسِيح. ڒْمُوْمِنِين اَذ ݣُّوْرن س أَرُّوْح ن مِّيس ن أَربِّي ذِي لْحُرِّيَا ن لْإِيمَان نْسن. س لْإِيمَان زِي مِّيس ن أَربِّي اَذ ذوْڒن ذ ثَارْوَا ن أَربِّي، يعْنِي يقْبڒ-يثن أَربِّي اَذ يڒِين ذ يحَرْمُوْشن ذ ثِحَرْمُوْشِين نّس. ثقَّار سُّوْرَا-يَا ذݣ وُوْذم وِيس 2 ذِي لْأَيَا 20: تْوَاصلّْبغ اَك لْمَسِيح. سَّا اَڒ ثْسَاونْت مَاشِي ذ نش إِ غَا يدَّرن لَّا، ذ لْمَسِيح إِي غَا يدَّرن ذَايِي. ثُوْذَارْث-أَ إِي دَّرغ ڒخُّو ذِي دَّات ينُو، أَقَا دَّرغ-ت س لْإِيمَان ينُو زِي مِّيس ن أَربِّي إِي ذَايِي يحِبّن يصدّق خَافِي يخف نّس. صنّط نِغ غر سْوَادَّاي اَوَاڒن نّغْنِي ن أَربِّي إِي د يُوْسِين ذِي سُّوْرَا-يَا قَّارن-اَس ثَبْرَات ن اَرَّسُوْل بُوْلُس غَار ڒْمُوْمِنِين إِي يدْجَان ذِي ݣَلَاطْيَا.
