Ṣenneṭ i ȓebƹaḏ n lʼayaṯ zi ssura umi qqaren Imezwura zeg wuḏem wis 11 aȓ 25. Ṯessawaȓ x ȓiyyam n Siḏna Brahim, ṯtarjem ḏanita s ṯmaziɣṯ n Arrif, iƹni ṯarifiṯ.
Ɣer ḏanita x mammec irezzu Siḏna Brahim aḏ isenjem ṯandint n Sadum ḏ ṯendint n Ƹamura zi lɣaḍab n Arebbi. Iban-d ɣares Siḏ Arebbi ḏ ṯnayen lmalaʼikaṯ akiḏes. Manaya aqa-ṯ ḏeg wuḏem wis 18 zi lʼaya 20 aȓ 33: Inna Arebbi: "Tesȓiɣ x ṯendint n Sadum ḏ ṯendint n Ƹamura belli ikṯar ḏaysent ccerr u ȓemƹaṣi n yiwḏan nsent mɣarent s waṭṭas. Aḏ d hwiɣ ḥima aḏ ẓreɣ bac aḏ ssneɣ nican manawiya ma ḏ ṣṣaḥ niɣ lla." Uyuren ṯnayen n yiwḏan nni [iƹni lmalaʼikaṯ nni] hwan ḏi jjihet n ṯendint n Sadum, maca Siḏna Brahim iqqim ibedd zzaṯ i Siḏ Arebbi.
Iqarreb ɣar Arebbi inna-as: "Aḏ tenɣeḏ wenni iteggen ȓxir akeḏ wenni iteggen ccerr? Y meȓa ṯufiḏ ḏinni ḏi ṯendint xemsin zeg yinni iteggen ȓxir, ma aḏ terḏem ṯandint amen tekmeȓ u war xas ṯƹeffuḏ ḏi ṭṭuƹaṯ n xemsin nni? Aḏ tenɣeḏ bab n ȓxir akeḏ bab n ccerr? Ȓxeddnnit aḏ tafeḏ am bab n ȓxir am bab n ccerr. U cek ḏ ȓqaḍi n ṯmurṯ amen tekmeȓ, ixeṣṣa aḏ tḥekmeḏ s ȓḥaqq."
Inna-as Arebbi: "Meȓa ufiɣ ḏi ṯendint n Sadum xemsin zeg yinni iteggen ȓxir, aḏ ƹeffuɣ x umcan nni amen ikmeȓ ḏi ṭṭuƹaṯ nsen."
Yarra-d xas Siḏna Brahim: "Ȓexxu nec qa renniɣ ssiwȓeɣ akiḏec aȓ Siḏi Arebbi, waxxa nec ɣir zeg ucaȓ waha. Y meȓa ṯenqeṣ xemsa zi xemsin? Aḏ tenɣeḏ ṯandint amen tekmeȓ ḏi ṭṭuƹaṯ n xemsa?"
Yarra-d xas: "Meȓa ufiɣ ḏinni ɣir xemsa u arbeƹin waha war neqqeɣ ca ṯandint amen tekmeȓ."
Issiweȓ ƹaweḏ ɣares inna-as: "Y meȓa ṯufiḏ ḏinni arbeƹin waha?"
Yarra-d xas inna-as: "War t neqqeɣ ca ḏi ṭṭuƹaṯ n arbeƹin."
Inna-as ƹaweḏ Siḏna Brahim: "Ixeṣṣa war xafi txeyyiqeḏ, ya Siḏi Arebbi, ejj-ayi aḏ kemmȓeɣ awaȓ inu. Y meȓa ṯufiḏ ḏinni ɣir ṯȓaṯin?"
Inna-as Arebbi: "War t neqqeɣ ca meȓa ufiɣ ṯȓaṯin."
Inna-as: "Ȓexxu bḏiɣ renniɣ akiḏec ḏeg wawaȓ. Y meȓa ṯufiḏ ḏinni ɣir ƹicrin?"
Inna-as: "War t neqqeɣ ca ḏi ṭṭuƹaṯ n ƹicrin nni."
Inna-as: "Ixeṣṣa war txeyyiqeḏ, aḏ ssiwȓeɣ amur-a waha, y meȓa ṯufiḏ ḏinni ɣir ƹecra?"
Yarra-d xas: "War t neqqeɣ ca ḏi ṭṭuƹaṯ n ƹecra." Aȓmi ikemmeȓ Arebbi ȓhard nnes akeḏ Siḏna Brahim uca itdurri, uca iƹqeb Siḏna Brahim ɣar umcan nnes.
